香港成日畀人批評旅遊設施十年如一日,景點來來去去三幅被,好難吸引回頭客。其實世事無絕對,只要肯動腦筋搞搞新意思,舊景點一樣可以變出新花款o架。

呢,好似尖沙咀星光大道咁吖,啟用至今超過十年都無乜變化,係人都覺得悶喇。康文署日前提出將尖沙咀海旁大翻新,其中星光大道會延伸至海濱花園,又會設立糅合電影藝術同港口主題作為建築設計嘅美食區、遊玩區同休閒區,除咗預留空間畀藝術家展示作品,仲會喺現有連接紅磡嘅天橋上加設觀景瞭望台。當局話喎,希望將海旁打造成「港人之港,活力之港」,聽落就幾吸引喇,但究竟做唔做得到,仲要睇過至知。

維港係香港最寶貴嘅天然資源,璀璨夜景更加被譽為世界三大夜景之首,聞名遐邇。所以話,只要做好包裝同配套,唔單止可以吸引旅客,市民亦多一個消閒去處,同時可以推動本土文化發展,一舉數得,唔係冇得諗o架。

不過咁,無論吹到幾巴閉都好,如果一味大隻講,都係嘥氣嘅啫。好簡單,港府話要將維港發展成世界級海濱,已經講咗N咁多年,成個海岸線至今只有十分之一建有海濱長廊,仲要好似斷橛禾蟲咁。港府舊年成立海濱管理局,聲稱一條龍處理海濱規劃設計、營運同推廣等工作,又展開公眾諮詢,係威係勢咁,點知到依家都未有下文。港產官僚吹水唔抹嘴,所謂「活力之港」會唔會又係齋噏當秘笈,好難唔令人擔心囉。

古人話,築室道謀,三年不成。其實計太一叮話齋,港府研究復研究,諮詢復諮詢,莫講話三年,三十年都未必成事呀!發展維港海濱係咁,發展大嶼山亦係咁,由老董時代話要興建物流園,現屆政府又話要打造橋頭經濟,又話要發展水療及休閒度假村,結果又點呢?講就天下無敵,做就有心無力,到依家仲係紙上談兵,問你服未。

當然喇,港產官僚議而不決,決而不行,固然累事,今日社會泛政治化,無良政客為反對而反對,亦難辭其咎。喺咁嘅政治氛圍之下,就算政府有宏圖大計,最後都係畀政客拖垮嘅咋。

點講都好,香港烏煙瘴氣,七國咁亂,好多旅客已經過門不入,當局再唔諗計救亡,開發多啲新景點吸客,遲早孤芳自賞咋,叮!

第一手消息請下載on.cc東網iPhone/iPad/Android/Windows Phone Apps