香港工業總會慶祝五十五周年嘅活動浪接浪，尋日趁周末，喺九龍灣一個商場舉行「愛心曲奇日」，招呼約三十名基層兒童及家長齊齊整蛋撻及曲奇餅。工總主席劉展灝（Stanley）、蛋撻王董事總經理莊裕坤及「家電大佬」中華廠商聯合會常董陳國民等人落場，着上圍裙整埋一份，不消幾分鐘，就有香噴噴嘅蛋撻食。工總行政總裁蘇家碧（Linda）仲帶埋囡囡Kylie嚟玩。

劉展灝（右）同陳國民（中）喺師傅教導下學整蛋撻。

蘇家碧（右）同囡囡Kylie嘅樣貌成個餅印咁。

Linda話當年辭官就係為咗湊囡，話咁快Kylie已經讀小六，仲高過佢添。嚟緊九月，Linda將過檔港鐵出任公司事務總監，近月高鐵超支兼延誤通車等甩漏愈來愈多，窟窿愈來愈大，Linda都苦笑話，依家唔諗咁多！

莊裕坤就話，依家小朋友已經好難接觸到農業及工業，以為想食米就去超市買，唔知米係農夫辛苦種出來嘅。今次活動，可令小朋友親眼見證用麵粉及雞蛋炮製蛋撻，亦可趁機教識佢哋明白飲食工業嘅艱辛。

第一手消息請下載on.cc東網iPhone/iPad/Android/Windows Phone Apps