政壇：民主阿婆設基金 「水源」神秘
同壹傳媒集團前主席黎智英關係密切嘅公民黨（公文袋）、外號「民主阿婆」嘅前政務司司長陳方安生又有新搞作，尋日正式成立一個「公民實踐培育基金」，由政治評論員詹德隆擔任主席，而民主阿婆、社聯前行政總裁方敏生丈夫張玉堂、公文袋主席余若薇丈夫胡健維、公文袋黨魁梁家傑太太陳淑儀等擔任副主席。不過，營運該基金的資金來源神秘，佢哋只肯透露大部分資金屬於私人性質捐出，難免引起外界猜測資金來源。
胡健維（左起）、前法律援助署署長張鄭寶蓮、張玉堂、詹德隆、陳方安生、陳淑儀、傳媒人蔡東豪成立「公民實踐培育基金」，但資金來源神秘。
張玉堂話，現有資金足夠應付基金前期工作，資金主要來自基金成員、認同理念嘅人捐款及私人募捐，至於究竟係邊個募捐及捐款數字，他就話唔想描述太多。另外，基金計劃於八月舉辦兩節工作坊，一節是選舉形勢分析，另一節是講解選舉法規、經費及技巧，亦會連繫到選舉有關嘅法律問題。被問到選舉前搞類似講座，會否產生牴觸，佢哋就辯稱區議會選舉十一月才舉行，有意參選人士未報名參選前，基金嘅講座已經完結，所以毋須計算選舉經費喎。
