政壇：陳勇轉飛機頭或利吸票
傳聞有意參加立法會新界東議席補選嘅新界社團聯會理事長陳勇，最近大變身，將蛋撻頭轉咗個飛機頭嘅新潮髮型，唔通有新動向？
陳勇髮型忽變，畀人唔少新鮮感。
一個人嘅衣着打扮、髮型都足以影響外表，有啲顯得刻意為之，有啲就係神來之筆，但陳勇話呢個係個意外。陳勇指髮型師係細佬介紹畀佢嘅，咁啱剪頭髮時瞓着咗，一瞓醒，就見到兩邊剷晒青，仲染咗少少啡色，直言嚇咗一跳。佢仲話，其他港區人大代表見到佢時，都笑佢應該係第一個剪呢個髮型兼走入北京人民大會堂嘅人大代表。不過，陳勇嘅太太就話呢個髮型冇咁老土，咁係讚定彈呢？
講到選舉，政圈呢輪真係好多排兵布陣，但建制派整咗個「世紀甩轆」事件，部分建制派政黨嘅地區人士可能「心中有鬼」，最近都刻意同所屬政團切割，無論係搞活動或派發宣傳單張，都唔敢再用政黨牌頭，避免政黨色彩過濃，中招就弊！
