內地A股連日急挫,指數由最高位回落,唔見咗千幾點,好多股民變咗股蟹,內地出盡法寶咁托市,因此又有「暴力救市」之名。港區人大兼喺大學教授經濟嘅劉佩瓊尋日表示,內地出盡咁多招數嚟救市,可以見到係有成效嘅;雖然佢話會諒解,但又同意救市令原本嘅市場機制「開倒車」,希望以後唔好再發生喎。講到經濟自由嘅大原則,劉佩瓊拒做應聲蟲,投咗減少干預嘅一票,只係,「暴力救市」係咪可一不可再,真係好難講。

設計圖片及對白

批內地股民「盲毛」缺知識

劉佩瓊尋日出席個電視節目,話中央推出多項措施救市,從依家掌握嘅資料嚟睇,中央對股市嘅監管措施不足,現時好多內地股民嘅知識又不足,更形容佢哋如「盲毛」一樣,對於呢種股民,佢認為內地當局需要加強教育,並且發展中介機構,協助股民投資。

只係,內地為咗穩定民心,由中央下令國家部委、央企、國企到商營機構全面投入,大家都奉命救市,奇招盡出後,先可以令市場稍為定啲,但對長遠金融發展,卻帶來好大嘅影響,甚至有意見認為,今次「暴力救市」,已令原本進行緊嘅改革措施廢晒武功。劉佩瓊話佢同意救市方法將原本市場化嘅機制進程「開倒車」,並認為內地都受到教訓,未來盼中央政府減少對股市干預,加強監管同擴大股市發展。

對股市現狀唔太滿意,但一啲都冇妨礙佢對內地經濟嘅睇好,劉佩瓊話,雖然內地股市冇高增長,但相信經濟都可以維持穩定喎。

第一手消息請下載on.cc東網iPhone/iPad/Android/Windows Phone Apps