遲到早退,返工遊魂,不務正業,一味做騷,咁都可以照逗人工,仲要薪高糧準嗰隻,問你服未。咩工咁筍?咪就係尊貴嘅立法會議員囉。

呢,立法會尋日舉行本年度最後一場特首答問大會,唔使問阿貴,又係反對派政客盡情表演嘅機會。有人進入議事堂十分鐘都唔夠,又喊口號又掟道具,結果被逐離場,提早收工。呢啲已經係例牌菜,市民早就見怪不怪,但政客次次都係咁,返工玩快閃,換轉係普通打工仔,早就執定包袱喇,只有政客至可以印印腳「坐以待幣」,咁仲唔係天下第一筍工?

當然喇,就算冇被逐離場,表現亦唔好得幾多。有人互相指罵,你鬧我垃圾,我擺你屋企人上枱,七嘴八舌,醜態百出,搞到議事堂好似街市咁。連立法會主席都忍唔住質問,「大家喺電視機前面仲表演唔夠咩?」

冇錯嘞,政客為反對而反對,為做騷而做騷,表演又點會嫌多吖。立法會審議將今年九月三日抗戰勝利七十周年列為法定假期,本來冇乜爭議性,點知一樣有人阻頭阻勢,諸多留難。太一叮諗極都唔明,打工仔多一日假期,商界都未出聲反對,點解口口聲聲代表基層嘅政客反而阿芝阿佐呢?再講吖,紀念抗戰勝利係所有中國人嘅事,有咩問題呢?所以話,政客逢中必反,已經到咗走火入魔嘅地步。

講開拉布,真係一匹布咁長。正正因為受到拉布阻撓,包括創科局撥款在內嘅多項民生議題遲遲未能獲財委會通過,財委會主席尋日宣布應政府要求加開會議,點知惹來反對派連番炮轟,話政府「好勇鬥狠」喎。嗱,呢啲咪就係惡人先告狀囉。如果唔係佢哋全面不合作,搞到議會空轉,施政癱瘓,點會積壓咁多議題呢?又使乜加會處理吖?

冇計喇,立法會又名「垃圾會」,點可能唔烏煙瘴氣吖。大家有眼見,無良政客有破壞冇建設,唔係掟嘢就係爆粗,唔係拉布就係流會,再唔係就喺議事堂上睇艷照,正經嘢完全唔理。不務正業都算嘞,有人居然收取政治黑金,利益衝突嫌疑水洗不清。你話嘞,納稅人出錢養呢班廢柴,係咪冤枉吖。

所以話,一個地方嘅沉淪唔係冇理由o架,香港時運不濟,港府管治無能,加上政客添煩添亂,再咁落去,想唔死都幾難,叮!

第一手消息請下載on.cc東網iPhone/iPad/Android/Windows Phone Apps