城中鏡：象哥早年與荔園天奴結緣

眾所周知，立法會進出口界議員黃定光花名叫象哥，呢個由細叫到大嘅花名亦帶挈佢收「象」禮收到手軟。象哥尋日就打咗條「碎花象」呔出席立法會會議，鮮黃色呔相當醒目，佢話除咗呢啲大象手信，早年荔園未結業之前，已經日日望住荔園隻真大象「天奴」，去中環荔園睇「假象」唔使預佢喇！

象哥早年住喺荔園附近，日日望住園內隻真大象。

象哥回憶早年住美孚中山台，由廚房同睡房窗口望出去都對正荔園，除咗日日望到園內隻大象，仲可以遠眺香港島，一望就十年，只係自從荔園結業，空地變住宅遮晒海景，象哥亦急急搬屋。

唔講唔知，原來荔園同象哥除咗係陳年「鄰居」，亦都係一九四九年出世，同荔園相當有緣。今次中環荔園翻生，象哥笑言未有時間入園，仲話園內一隻雞脾都幾十蚊太貴，莫講話入去餵假象食蕉。睇怕象哥要向荔園要求「我要真大象」至得。