城中鏡：曾浩輝忙於追女仔
美國喺上月底通過同性婚姻合法化，成為世界熱話，連性取向一直惹來外界揣測嘅衞生防護中心前總監曾浩輝都關注呢個議題。獨身多年嘅曾醫生，外間盛傳佢擇偶嚴謹，絕色佳麗都難以打動佢。不過，前日佢出席活動時，連聲否認對女性無興趣，笑言退休後最忙係追女仔，仲隨即攞出手機內一張與美女嘅合照示威，難怪講到同性婚姻合法化，佢都淡淡回應話：「無特別感覺」喎。
曾浩輝（右）欲脫離單身一族，近日努力追女仔，未知身旁嘅食物及衞生局副局長陳肇始又情歸何處呢？
方文雄（右）話會趁平撈地產股，東華三院副主席廖偉麟（左）就直言怕風險高，寧願買「磚頭」。
陳宇齡（右）笑言公司喺港股狂瀉日上市好驚嚇，幸有太太陳文綺慧（中）同港大校務委員會主席梁智鴻（左）打氣。
退休已兩年多嘅曾浩輝，前日出席友人Abraham陳宇齡任主席嘅培力控股上市慶祝酒會，但身邊未見有女伴相隨。不過，佢似乎唔心急，仲向記者展示手機內的「集郵相」。係咪新女友？曾醫生賣關子話：「唔話你知」。提到同性婚姻，佢輕描淡寫話無乜意見，但當年去美國深造時曾接觸呢個議題，感覺幾政治化，所以覺得香港未夠成熟令市民支持。
方文雄趁低撈優質股
當晚宴會席間唔少名人狂刨財經新聞，關注近日中港股市跳樓式下跌，就連曾浩輝買藍籌股都要做「蟹」。同場嘅香港南京總會創會會長張心瑜話都忍痛斬倉保住微利，但有朋友慘輸逾億元，好陰功。
協成行董事總經理方文雄都直言身家縮水，但手上股票係爸爸多年前買落，即使股市狂瀉依然有錢賺，會趁低撈優質地產股及科技股。數最慘嗰個，應該係Abraham，佢公司喺港股大跌兩千幾點當日上市，股價慘被質到「潛水」，好彩尋日升番上五元。
