政壇：搞搞政：立會嗌大交 辣埋屋企人

答問大會喺上午九時三十分開始，人民力量「大舊」陳偉業同陳志全分別舉紙牌同黃傘抗議，社民連「長毛」梁國雄遲到，之後走入會議廳仲大叫「賊來了，哈哈」，當時立會主席曾鈺成已警告佢再違反議事規則，就要離開會議廳。但係大舊就不斷揮動紙牌同喧嘩，搞到特首要求主席裁決；工黨李卓人就質疑特首根據邊條議事規則要求裁決。

泛民嘅紛爭未平息，轉個頭又到建制派扭計，工聯會黃國健同王國興、馬逢國、建仔葉國謙先後要求主席嚴格執行議事規則，搞到主席扯晒火，話自己按議事規則主持會議，唔使人提佢規程問題，「大家喺電視機前仲表演唔夠咩？」佢又呼籲議員要維護議會尊嚴。

休會過後仲混亂

其後長毛不斷喺座位上喧嘩，喺接近十時被趕離場，期間同保安拉扯同大呼小叫，主席宣布休會。以為休會可令大家冷靜啲，點知愈吵愈烈，仲搬埋屋企人出嚟講。黃毓民同大舊係咁鬧特首，建仔Ann蔣麗芸就出聲護航，話清理垃圾時要掃埋佢哋走。

大舊反駁話當年前特首董建華就係掃完街就落台，依家建仔請特首搞掃街，係咪想歷史重演；其後又指阿Ann嘅父親蔣震為共產黨服務，令阿Ann大怒，一邊步向大舊，一邊強調父親係抗日戰士，「你（大舊）估我唔知你老婆同個女做咩呀！」然後氣沖沖離開會議廳。阿Ann嘅黨友黃定光亦批評大舊唔應該搬人阿爸出嚟講，大舊先知衰，話自己係高度讚揚蔣震喎。睇到議會咁嘅質素，香港想有運行都幾難。