近日受內地股市同希臘債務危機等外圍因素影響，港股起跌如坐過山車，唔少市民都成手蟹貨，唔知等到幾時先返到家鄉。工聯會立法會議員KK黃國健都喺呢個大時代做咗「小閘蟹」，佢話上月喺高位買咗內銀股農業銀行，但就唔肯透露買咗幾多手，同乜嘢價位入貨，淨係話係市場投資啫！

黃國健成手農行股票蟹貨，未知幾時先返家鄉。

睇番農行一個月高位係四個兩毫九，上月多數都過四元，即使尋日港股全日升番八百幾點，部分內銀股都有回升，但係農行就一仙都冇升過，冇起冇跌，收報三個五毫九，即係話KK入貨至今，極有可能跌超過一成，認真黑仔。

跌成咁，一般市民可能都會心驚驚，唔知幾時先平到手，但KK就話唔算太擔心，相信銀行股點跌都唔會血本無歸喎，坐艇都好過依家沽貨蝕錢嘛！

第一手消息請下載on.cc東網iPhone/iPad/Android/Windows Phone Apps