政壇：沈祖堯似諷梁卓偉揀錯科
中文大學醫學院早前宣布推出尖子可直升二年級的「跳級制」吸納「尖中尖」，惹來香港大學醫學院院長Gabriel梁卓偉極大反應，質疑教育係「冇捷徑」。中大校長沈祖堯尋日出席無止橋慈善基金一個新書發布會時，被問到應屆文憑試畢業生選科要注意嘅事項，佢就寄語學生最緊要揀啱自己鍾意嘅科，仲舉例話唔係鍾意做醫生就唔好揀讀醫，費事第日先發現原來自己鍾意嘅原來係音樂，人生就會有缺陷喎。音樂？點解咁熟口熟面嘅？
設計圖片及對白
夾硬讀完都唔開心
眾所周知，Gabriel當年被父親逼讀醫科，本來想做音樂家嘅佢因為被父親反對，覺得從事音樂搵唔到食，被要求讀醫科，結果今時今日佢都依然常為樂團擔任指揮，可見佢對音樂有幾熱愛。尋日沈祖堯勸學生揀科時一定要揀自己鍾意嘅科，唔好受旁人或社會價值取向影響，否則夾硬讀完真係做到醫生都唔會開心，總會覺得人生具備缺陷，輕輕一句，真係夭到Gabriel應一應。
沈祖堯又話「跳級制」絕唔係諗住醫學教育可有捷徑，畢業去搵錢，而係希望香港可以培育多幾位除咗讀書之外對醫學研究及發展都有興趣嘅人才，將來可以投身做無國界醫生或農村醫生等，又認為香港缺乏同時做臨床又能做科學研究工作的人。佢又話知道近來好多爭議，中大醫學院同事亦明白外界顧慮同誤解，會提供所有資料以配合醫務委員會審核，又保證作為一個負責任的教育團體，中大唔會畀學生求求其其畢業就成為醫生。
講番尋日發布嗰本新書，沈祖堯都有份寫，兩年前仲親身到甘肅省參與興建「香港中文大學金禧無止橋」，佢分享時話第一次去環境咁惡劣嘅地方，由於大小便時只喺屋後一些空地上，笑言對住啲雞同豬，怕醜屙唔出，搞到嘢都唔敢食喎。
