高鐵黑洞仍未填 西九隨時又爛尾
超支復超支，超支何其多。香港頭頭碰着黑，基建工程無一不延誤，無一不超支，高鐵固然烏龍百出，西九計劃亦淪為財政黑洞，隨時爛尾收場，世界級文化區淪為世界級笑話，問你怕未。
即係咁，當局去年聲稱因為建築成本上升，加上高鐵工程延誤影響交地時間，西九項目面對沉重嘅財政壓力，原本嘅二百多億元撥款只夠支付首兩期工程，第三期工程便無以為繼，需要再檢討喎。好嘞，檢討咗成年咁耐，到底有何結果呢？身兼西九董事局主席嘅政務司司長林鄭月娥再向立法會匯報最新進展時承認，目前滾存嘅資金依然不足以應付第三期興建音樂中心及大劇院等四項設施，需要另行研究其他融資方案喎。
係人都知，第三期工程係成個西九計劃嘅重中之重，如果冇咗大劇院等設施，同普通文娛中心冇乜分別，當局洗濕咗個頭，焗住要頂硬上。問題係，巧婦難為無米之炊，面對咁大個財政黑洞，究竟點算呢？當局聲稱希望透過融資令西九可以自負盈虧，增加彈性，唔想淪為資助機構，不利藝術發展喎。其實係人都聽得出，呢啲根本係自己呃自己，港府明知以今日咁嘅政治環境，向立法會追加撥款幾乎係不可能完成嘅任務，惟有退而求其次，所謂研究其他融資方案，即係黔驢技窮咁解。
不可不知，融資講就容易，實際一啲都唔易。融資嘅唯一可行方案係提前發展西九商業項目，咁就要向西九管理局批出相關發展權，到時反對派政客仲唔借題發揮，阻頭阻勢咩。再講吖，家陣連首兩期工程都無影無蹤，究竟有冇財團肯落疊，只能望天打卦咋。當局口口聲聲為項目籌款，減輕財政負擔，講到似模似樣，其實純粹係大隻講，唔怪得立法會議員質疑西九唔止係大白象工程，仲可能成為爛尾嘅大白象工程添。
講起真係好笑，西九文化區足足講咗十幾年，依家仲係爛地一塊，你話係咪世界級笑話吖？所以話，冇咁大個頭就唔好戴咁大頂帽，港產官僚揚言要將西九打造成媲美西班牙畢爾包、美國古根漢、法國龐比度嘅世界級文化中心，可惜眼高手低，卒之搞到唔湯唔水，騎虎難下。計太一叮話齋，家陣土地咁珍貴，如果將西九改為發展住宅，淨係賣地最少都有幾百億元進帳，點都好過爛尾收場喇，叮！
