城中鏡：陳宇齡首創用吉盒展銷
相信好多人都試過，去連鎖藥房買貴價保健品、如靈芝、蟲草等，貨架上嘅盒原來係空無一物嘅，只係畀人睇，去櫃枱畀完錢先有實貨攞。尋日本土保健品培力控股首日掛牌，創辦人兼主席陳宇齡揭曉，原來展示「吉」盒嘅橋，係佢度出嚟㗎。
陳宇齡（左）二十多年前諗到用吉盒陳列貴價品。
話說二十幾年前，某連鎖藥房因保安問題，搞到唔敢賣貴價保健品，因為「幾百蚊一樽嘅，畀人偷咗咪死？」陳宇齡當時就諗，如果用「吉」盒嚟陳列，既畀顧客睇到貨辦，但又冇餡，咁咪冇事囉，結果，呢個二十幾年前嘅靈機一觸沿用到依家。陳宇齡間公司尋日上市，屋企人仲專程由多倫多飛十幾個鐘嚟香港撐場，而佢都送咗隻金靈芝畀港交所作紀念。
