政壇：鍾少權力谷銀髮族按揭
人口老化及愈趨長壽係世界大趨勢，本港亦一樣，而且，港人長命仲排過世界第一添，由於大量銀髮族，近年嘅銀髮生意都愈來愈多，銀行亦好重視呢個市場，永隆銀行助理總經理及零售銀行部阿頭鍾少權（Derek）尋日就專登去到會展，出席一個銀髮族產品展力谷安老按揭，同佢拍住上嘅仲有按證公司高級副總裁（業務運作）陳達強。
鍾少權
Derek喺台上都講得幾白，話依家後生嗰班嘅入息未必好高，長者參加呢類計劃可以保證每個月有穩定嘅年金收入，今年佢哋就有位客拎到每月近十六萬年金添。嘩，數字好吸引，但要講清楚人哋之前嘅投入有幾多至好喎，否則啲與會者一個唔該誤會咗，就唔好啦。
唔講唔知，呢次原來仲係Derek第一次喺產品展主講，睇佢尋日表現好淡定，安老按揭計劃仲引起現場人士嘅討論添。
