政壇：發叔撐拐杖現身唔使等

鄉議局前主席、立法會議員劉皇發（發叔）身體抱恙，近排立會會議都少見佢，早前政改方案表決時，建制派議員仲因「等埋發叔」而集體「甩轆」，搞到發叔嘅健康成為網民熱話。

發叔撐住拐杖現身立法會，望落精神相當唔錯。

發叔尋日現身立會，亦係甩轆後首次，經民聯嘅林健鋒等黨友全程傍實佢，仲陪埋搭𨋢添，見發叔要撐住拐杖行路，但望落精神相當唔錯，佢仲多謝大家關心添。

發叔尋日返立會，係咪又係因為要投重要嘅一票呢？原來佢尋日現身，並唔係有票要投，只見佢行入會議廳打咗個轉，然後就同黨友開會嘞，中午完會後就即閃，仲勁過「三點不露」呀！似乎此番持拐出動，都係返嚟同黨友開會啫。