政壇：搞搞政：李小加撥火 傳辣慶政府
港股急升完又急跌，「大時代」過山車嘅滋味真係令港人無所適從，唔少人一手蟹貨。回顧過去三個月，港交所行政總裁李小加不時好似財經演員咁唱好港股，據聞連港府高層都對佢「多嘢講」有微言，認為身為港交所高層，唔應該火上加油、高調唱好。依家港股插水式下跌，有冇人搵佢算帳暫時未知，但李小加就突然隱晒形囉。
設計圖片及對白
港府官員有不滿，皆因佢哋對投資市場嘅動向一向好小心，更深明政府一句話，隨時畀人演繹為入市訊號，有港府高層就話，呢幾個月李小加似乎唔係好守規矩，不停唱好港股，一時話港股大時代未見頂，一時又話Ａ股係世界上最透明市場。據聞，港府財經官員愈聽愈覺唔對路，佢哋嘅判斷係港股基本因素喺過去數月其實無變，按道理恒指唔應該無端端被推高至二萬八千點水平，即使未來推出深港通，亦唔代表大量資金流入本地市場，所以部分細價股無端被炒起，仙股升格至毫子股，好唔健康噃。
因此，政府內部漸漸想制止李小加言論，以免炒到癲晒嘅股市更瘋狂。又係嘅，對比以往港交所高層，例如前行政總裁周文耀，就知道李小加真係幾多嘢講。話時話，李小加今年啱啱續約，除咗年薪高達九百萬元外，手上仲持有近六十萬股港交所，就算以尋日每股急瀉價二百零三元計算，總值都達一億二千二百萬元，如果股價稍升，佢荷包真係脹到不得了。
