政壇：全民皆股張德熙早離場
中港股市近日插水急瀉，血流成河，唔少散戶輸得傷亡慘重。有三十幾年炒股經驗嘅金銀業貿易場監事長張德熙（Haywood）就避過一劫，個多月前將倉內七成股票沽出，獲利一半。及時「走鬼」，唔係未卜先知，而係睇見傳媒早前不停吹噓散戶如何月賺數十萬元，佢話全民皆股，必是股災先兆喎。
張德熙憂港股仍有震盪，未敢入市撈底。（資料圖片）
經歷多次股災，Haywood炒股步步為營，個多月前喺高位沽貨，看似未「食到盡」，但近期股市插水，回頭一想咪話唔驚。佢直言早前內地Ａ股升到唔識停，佢已擔心升市係「虛勢」，加上身邊唔少人索性辭工全職炒股，心中響起警號，股災必近矣。
「七三、八三、八七股災都係咁，大跌前總會營造一種全民皆股，人人執錢，唔炒你就執輸嘅氣氛。」雖然及早離場，Haywood慨嘆沽得唔夠狠：「我應該將其餘三成貨都沽埋，就係衰貪心，唔夠狠心。」何不沽期指賺一筆？佢話怕風險太高，唔敢亂沽，但依家就印印腳等撈底，唔使心急。
