政壇：黃成智參戰 泛民鬼打鬼
立法會議員湯家驊早前退出公民黨（公文袋）兼辭去立法會議員職務，導致其新界東議席需要進行補選，依家公文袋屬意由楊岳橋（Alvin）接班，但同屬泛民主派嘅民主黨（白鴿黨）前中委黃成智又話考慮緊參選，雖然白鴿黨即刻有老鴿話要勸退成智，但據聞成智同人講，就算下星期被踢出黨，佢都會照樣考慮出選。睇嚟，成智都好踴躍想同Alvin嚟一場激烈火併。
設計圖片及對白
由於新界東議席補選係單議席單票制，若果泛民協調唔到一個人出選，就會分薄票源，當選機會大減。不過，據聞成智同人講，話冇理由泛民到呢個世代仲講「接班」，家陣唔係話欽點邊個就邊個做，如果只係讓路畀公文袋，就變咗係逼泛民支持者淨係可以支持公文袋。
加上Alvin係新人，入到議會仲要熟習《議事規則》，幾個月時間根本做唔到啲乜，所以成智覺得應該畀選民多個選擇。至於泛民係咪應該搞初選，據聞成智計過自己勝算唔高，冇理由陪跑，所以真係出選嘅話，就會用獨立身份出戰，唔玩初選喎。
溫和白鴿游說免驅趕
成智下星期四要面對白鴿黨中委「審判日」，討論佢發起政改「袋住先」聯署涉嫌違反黨紀。聽聞佢已經去信中委會重申自己最終煞停咗聯署，並無真係違反黨紀。據知黨內亦有聲音認為唔應該對創黨黨員去到咁盡，當中元老張文光同楊森都有份出聲游說，而靠近溫和派嘅中常委吳永輝、周錦紹，以至副主席尹兆堅，都對踢成智出黨有所保留。如要踢人出黨，要有十七票，以依家二十七名中委計，即係佢仲需要多五票，先有機會留番喺黨。不過，如果成智有得留低，佢又會否為咗出戰新界東補選而退黨呢？
泛民陣營鬼打鬼難免，其實建制陣營亦有幾支隊伍有意出選，新界東呢場補選果然係一場混戰。
