議程堆積拒開會 政客惡人先告狀

太一叮講緊嘅咪就係立法會議員囉。由於反對派政客不斷拉布，導致議題大塞車，港府為咗惠民措施盡快獲得通過，不惜抽起創新及科技局嘅撥款申請，優先處理十一項民生議程。點知反對派連民生議題都唔放過，照樣拉布可也，過去兩星期財委會只係通過六項議程，就算暑假前最後三次會議加開一節，每次會議開足六小時，亦冇可能審議晒所有議題，莫講話創科局撥款無望喺暑假前通過，其他民生議程亦隨時泡湯。

面對此情此景，港府惟有出招應變，要求財委會喺本月中加開五日會議。呢個要求可唔可以得到財委會配合仲未有定案，但反對派已經急不及待群起攻之，指摘政府咁做係「撩交嗌」，一定會「全力開戰」，誓要拖垮創科局喎。最荒謬嘅係，代表資訊科技界嘅政客唔係為業界爭取成立創科局，反而話港府咁做只會傷害行政立法關係。嗱，呢啲咪叫做顛倒是非，惡人先告狀囉。

係人都知，香港創新科技落後鄰近地區九條街，唔止被新加坡、南韓遠遠拋離，連台灣及內地都比唔上，再唔急起直追，連食塵都冇份，仲有乜競爭力可言吖？港府三年前已提出成立創科局，點知反對派大搞不合作運動，直到最近先至獲得立法會大會通過，家陣去到財委會呢一關，反對派繼續玩嘢，問你怕未。

昨日因，今日果。如果唔係反對派為反對而反對，唔係拉布就係流會，有破壞冇建設，議程又點會堆積呢？港府又使乜要求加開會議呢？普通打工仔未完成手頭工作，開OT好正常嘅啫，何況係高薪厚祿嘅立法會議員？再講喇，開會係議員嘅基本職責，加開會議處理積壓議題亦係天經地義，政客有乜理由反對吖。

所以話，政客靠得住，豬乸會上樹。部分政客譁眾取寵，一味做騷，爆粗、擲物、掃枱、睇艷照無奇不有，部分人更加連會都唔開，出席率奇低，立法會唔烏煙瘴氣至奇。

悠悠萬事，民生為大。最新民調顯示，近八成受訪者最關心民生及經濟問題，只有一成七人關心政治問題，政客繼續玩嘢，因住連僅餘嘅政治資本都蝕清光吖，叮！