政壇：搞搞政：同性婚姻　湯恩佳唔反對

指有助抑制人口膨脹

湯恩佳嘅態度較一面倒反對嘅宗教人士相對開放，佢解釋，自古以來，中華大地已有「斷袖分桃」、「龍陽之癖」等典故，既然同性戀喺社會上出現咗咁耐，世界依然如常運行，所以佢認為同性婚姻都冇咩所謂；況且同性戀多數係先天嘅時候已經形成，後天都無法勉強喎。

但唔少人質疑同性婚姻會對家庭同婚姻制度造成衝擊喎？湯恩佳就話，自己好多年前喺美國三藩市見過一啲大型嘅同志遊行，雖然見到佢哋奇裝異服，會有啲「礙眼」，而睇到兩個大男人攬攬錫錫都覺得唔係好自然，但就感覺到佢哋嘅社群好和諧，唔覺得會對社會生產力、經濟、組織家庭，甚至婚姻制度有咩影響。

佢仲話，其實依家全世界嘅人口已經有七十幾億人，地球人口已經膨脹得太緊要喇，地球嘅資源根本無辦法應付大家嘅需要，同性婚姻正正可以抑制人口膨脹。