政壇：A股大跌庫克諗計救「果」
內地股市連跌多日，國家財金部門及機構出盡板斧救市，但股民都人心虛怯。不過，呢一波A股過山車，受損嘅原來唔止小股民，連美國巨企都受拖累，當中包括Apple舵手庫克呀。
iPhone生意受損，庫克睇怕都要抽時間諗對策。（資料圖片）
尋日有分析講到內地股市下跌，喺美國上市嘅蘋果公司（Apple Inc.）都走唔甩，原因係股民蝕錢，iPhone都買少部，所以將中國市場份額睇得愈重，呢一波必定跌得更慘。好似蘋果咁，舊年嘅營業額中，有17%係中國市場貢獻嘅，而上季iPhone喺中國嘅銷量仲首次超過美國，做咗No.1，早排庫克先專登開個中文微博嚟冧中國嘅果粉，原本係想拓展中國市場，但家吓股市大跌，庫克睇怕都要抽時間諗對策，多過寫微博就真。
大鑊嘅，可能仲包括電動車Tesla，之前啲內地科技同金融年輕才俊就算無充電站配合，都一樣一架架咁買，以彰顯身份同品味，依家呢類才俊可能已經被困喺個A股廢墟，坐艇唔再坐車囉。
