政壇：楊自遠靠「靈牛」護股價
呢輪股市日日上演大時代，搞到好多股民驚青心灰乜都齊，而新股上市嘅公司更加有壓力，尋日都有三隻新股上市，其中得罐頭水果商天韵國際守得住個招股價，點解咁叻？唔知同佢哋送咗隻琉璃靈牛擺設畀港交所有冇關呢？
楊自遠（右）送畀港交所嘅就係呢隻琉璃靈牛，全世界得一隻。
睇番前日嘅暗盤，天韵表現本來跌一成，係三隻新股中最弱，到尋日，上市儀式中，天韵以琉璃靈牛相贈，結果牛一出，佢哋嘅股價就浮番水面，最高仲較招股價多一成添，雖然之後回落，但收市都力保招股價1.28蚊。天韵話，送琉璃靈牛係寄望港股牛氣沖天，公司業務表現氣勢如虹，蒸蒸日上，仲話呢隻牛係主席楊自遠特別喺山東物色訂造，全世界得一隻。港交所都按慣例，送贈一式一樣嘅銅牛擺設回禮，大家都望大市牛氣沖天。
