政壇：EQ手機保護貼 疑A貨
智能手機流行之後，帶來好多方便，但亦帶來好多煩惱。好似建制派議員嘅手機WhatsApp群組對話內容外洩，又有官員、議員嘅手機顯示屏被傳媒影到，內容出咗街。政圈好多人都怕怕呢股外洩風，於是各師各法堵塞漏洞，例如唔少人會專登買防偷窺顯示屏保護貼，但弊在又有新問題出現咗，建制嘅葛珮帆（EQ）就係人辦；早排佢嘅手機內容被人影到，而佢竟然係呢種加密保護貼嘅使用者，結果畀人質疑佢用A貨。
（設計圖片及對白）
辯稱角度問題
葛珮帆話，一直有用開手機防偷窺螢幕保護貼，但點解佢仍然被人影到手機訊息內容呢？有朋友笑佢用A貨，葛珮帆就否認，佢話呢張保護貼係其他人買畀佢嘅，幾多錢已經唔記得咗，佢強調被人影到係角度問題啫，就算用幾貴嘅保護貼，都總有個角度會睇到，惟有以後睇電話時小心啲。
建制派早前喺政改方案表決期間連環「甩轆」，集體離場無投票，已經好大鑊，之後嘅手機WhatsApp群組對話內容又外洩，更加搞到一眾人變咗驚弓之鳥，唔少建制議員一提起手機，真係大把不愉快經歷呀。只不過，做咗保密工夫唔代表安然無恙，從葛珮帆嘅經驗嚟睇，就可以見到並非萬無一失，唔怪得短訊事件曝光後，建制雖然冇改用其他手機通訊程式，但就選擇唔講重要嘢，咁算唔算斬腳趾避沙蟲呢？
其實，議員開緊會如果唔睇手機，係咪可以更專心呢？葛珮帆就話，佢一般喺會議廳只會做同議會相關嘅事，但係唔睇手機都講唔過去，因為佢哋亦控制唔到朋友傳咩畀佢哋。又係嘅，今時今日即時通訊功能強大，通訊迫切性又大，只能依靠用戶自己醒醒定定、小心翼翼。
