【本報訊】出生三天即被送至養父母的家的鍾艷群，十九歲某天，突然獲養母告知身世，惟有感「生娘不及養娘大」，加上工作繁忙，多年來只有把對親生父母和兄弟姊妹的思念藏心底；如今五十四歲的她，去年於鬼門關前走了一趟，動手術切除頸椎神經腫瘤，頓感人生無常不想留憾，今年初決定尋親，在紅十字會穿針引線下，上月終與家人團聚。對當年被拋棄，她一笑置之：「我要多謝番佢哋（親生父母）添」，只冀餘生盡孝道。

失散逾半世紀，（左起）方惠芳、鍾艷群及方炎之三姊弟終於團聚。

鍾艷群（右）對能重見生母（左）已感滿足。（受訪者提供圖片）

鍾艷群本名方惠容，本另有十一名兄弟姊妹，尋親首半年杳無音信，直至消息獲傳媒報道後，終被五姊方惠芳發現:「阿媽一直有講有個妹出世三日就畀人抱走，睇到報紙篇報道寫啲名都脗合，就打電話去問。」最後，憑着已過世的方父留下寫上鍾的出生日期及其養父母名字的簿，終確認親屬關係：「唔使驗DNA。」

沒怪責親生父母

「世紀會面」安排於上月二十三日，「第一眼見到家姐，覺得佢好似我一個朋友」、「我覺得呢個妹同其他細佬妹幾似樣，唔知點解特別好傾。」兩姊妹你一言、我一語，顯露相似的笑容。鍾表示:「之前覺得係大海撈針，計一計親生父母都唔後生啦，諗都諗唔到竟然仲在生。」方母已屆九十五高齡，意識和記憶模糊，「我摸下佢，叫咗聲『媽』，我諗佢知道嘅。」

「基本上唔怪佢哋，都係想仔女好，我要多謝番佢哋添，唔係佢哋帶我嚟呢個世界，我邊有機會做到想做嘅事。」未來她希望多點探望生母，與兄弟姊妹保持聯繫。

紅十字會由一九五一年起助市民尋親，至今收逾三萬宗求助，每月新增十多宗，成功率約三成半。

第一手消息請下載on.cc東網iPhone/iPad/Android/Windows Phone Apps