公院淪戰地醫院 醫管局百病叢生

話說港府兩年前大鑼大鼓成立醫管局檢討督導委員會，話要全面改革醫管局喎，一拖再拖之下，報告終於完成，預料今個月中出爐。報告除咗批評醫管局山頭主義、資源分配不均等，仲不點名批評威爾斯親王醫院同伊利沙伯醫院急症室長期大擠塞，已獲評估需要住院嘅病人長時間滯留急症室，上唔到病房。委員會成員巡視威院急症室，見到診症區內擠滿臥床同坐輪椅嘅病人，有位老婦聲稱等咗超過兩日。委員會形容威院急症室擠迫如「戰地醫院」，一啲都冇誇張。醫學界人士踢爆，威院急症室之所以長期逼爆，係因為內科病房堅拒加床，搞到病人「倒灌」急症室，最高峰時有近百名病人乾等，簡直係虐待。

伊院急症室亦唔好得幾多，本報記者實地觀察所見，觀察病區近傍晚時分坐咗二十幾名病人等候上病房。其實，伊院內科病房同樣超晒負荷，入住率閒閒地達百分之一百二十，冬季流感期更加去到百分之一百三十，搞到走廊經常要加床，咁仲唔係戰地醫院？

咪睇威院同伊院號稱龍頭醫院，其實係金玉其外，敗絮其中。當然喇，一榮俱榮，一損俱損，急症室亂象叢生，只係整個公共醫療系統百病叢生嘅縮影咋。大家有眼見，近年公院烏龍百出，事故不斷，打錯針、輸錯血、派錯藥、開錯刀，鑊鑊新鮮鑊鑊甘。

公共醫療之所以問題多多，講到尾都係因為醫管局管理混亂，尤其係七個聯網淪為七個山頭，互相爭權奪利，勾心鬥角，有乜法子唔出事吖。最離譜嘅係，試過有醫院白內障手術輪候時間已縮減至零，本來想幫輪候時間長嘅醫院分擔病人，點知對方竟然擔心病人少咗會被削減資源而一口拒絕，你話係咪匪夷所思吖。

點樣先至可以清除山頭主義？有人建議聯網總監同各醫院行政總監定期轉換，有人建議部門主管改行固定任期合約制，醫療官僚話就話會重視問題，但委員會嘅報告認為聯網制度行之有效，只會執位重新劃界，到底可唔可以解決問題，真係好難令人樂觀囉。

點講都好喇，治重病用猛藥。公共醫療系統病入膏肓，小修小補係冇用嘅，係時候嚟一次大手術喇，叮！