政壇：搞搞政：新界東補選建制派爭崩頭
新界東立法會議席因為有議員請辭而需補選，公民黨嘅楊岳橋上屆名單已經排第二，今次被點名要求接棒，但得唔得真係要問過建制派喇。民建聯嘅傳聞人選已經有新界社團聯會理事長陳勇、北區區議員劉國勳；仲有建制協調機制之外、上屆選舉欠幾千票嘅西貢區議員方國珊（哪吒），仲有上水鄉事委員會主席侯志強亦都「扭計」要參選。咁爭法，想唔打崩頭都難喇。
設計圖片及對白
方國珊去旺角上水宣傳
我哋聽聞，哪吒早已為年底區議會選舉部署十三人鑽石名單，唔理泛民、建制嘅區議員都照埋手，由於哪吒一向唔聽命於建制協調機制，而且上屆立法會選舉成績只係比末席嘅范國威少約四千票，難怪佢雄心壯志。聽聞近日佢已經踏出將軍澳地頭，去咗旺角東鐵站及上水派工作報告，擺明劍指東鐵沿線嘅新界東居民。
建制各黨派之間亦各懷鬼胎，唔少政黨擔心今次「抬轎」後，明年選舉嘅選票冇得返轉頭，變相為民建聯雙手奉上第三席，所以都要睇定啲。有建制中人分析，一場補選參選人可以最少兩次免費郵寄宣傳單張畀選民，唔少明年有意參選正式選舉嘅第二梯隊，應該都會落場試水溫兼增加曝光機會，當宣傳都好過冇。
