政壇：人力晚宴大舊自爆瘀事
人力民量（人力）尋晚舉行四周年聯歡晚宴，為咗籌款，該黨立法會議員陳偉業（大舊）席上不惜大爆多年來嘅蝦碌同尷尬事。唔經唔覺，大舊從政已經三十年，參加過十八次選舉，佢經常被趕出議事廳，但原來第一個趕佢出去嘅係前立法局主席黃宏發，尋晚佢哋兩個喺晚宴上碰頭，坐埋一齊講當年。
陳偉業（右）為人力籌款不惜自爆從政瘀事，包括被黃宏發（左）趕出會議廳。
大舊話，好多人都唔知佢做社工出身，以為佢係律師或工程師，搞到依家不時都有市民打去佢辦公室問法律問題。不過，最搞笑都係街坊成日覺得佢好熟口面，問佢係咪拍過劇集，佢就反問對方係咪喺三級片入面見過佢喎。至於最尷尬嘅事，莫過於當年搭地鐵去立法局，落車時有一名市民掟咗張紙仔畀佢，大舊話，以為紙上面寫咗啲勉勵說話，或者係留低電話，點知紙上竟然寫住「陳議員，你冇拉（褲）鏈」，搞到佢面都紅晒！
