政壇：胡慧中盼塵爆傷者早康復
台灣塵爆事件令人關注燒傷者嘅漫漫康復之路，民政事務局前局長何志平太太胡慧中（Sabrina）尋日出席一場分享會時，諗起二十六年前拍爆破戲時被嚴重燒傷嘅事件，仍不免眼泛淚光。佢話時間係最好嘅良藥，希望今次受傷嘅年輕人可以克服痛苦及負面情緒，早日走出陰霾。
胡慧中對當年燒傷仍歷歷在目。
Sabrina係應好友香港華菁會主席陳晴（Judy）邀請，出席「華菁沙龍：名人下午茶」活動，同一眾成員分享從台灣到香港嘅人生經驗及轉變。Sabrina細述當年喺香港人生路不熟，又唔識廣東話，不過最難捱嘅莫過於曾經轟動娛樂圈嘅燒傷事件。Sabrina話，當時佢有三成半皮膚燒傷，只要一注射嗎啡身體即產生排斥，連膽汁都嘔埋出來，要靠食安眠藥先瞓到，仲日日都發噩夢，終日以淚洗面。
當年外界以為佢會退出娛樂圈，不過Sabrina以堅強意志力克服復出，成為圈中佳話。Sabrina就話，當時佢心態很負面，最終走出陰霾嘅秘訣係不斷與自己對話，同自己講上天留佢一條生路實有特別意思，最終先至行番出嚟。
