政壇：吳得掂做車長忙解畫
香港教育界嘅其中一大死結係教學語言，最近當局有關教學語言微調政策嘅周期檢測完成，結果喺學生人數減少、達標以英語教授學生不足嘅情況下，教育局依然維持英中唔落車嘅政策，結果遭批評不符機制，雖然有意見認為政府維持教育穩定，但亦有人指開壞先例。教育局局長吳克儉（吳得掂）連日解畫都拆唔掂，尋日佢呼籲大家唔好政治化件事喎。吳得掂家吓就好似守住車門嘅車長，一方面要保唔落車，一方面又要懶公平。
設計圖片及對白
教協斥自欺欺人
吳得掂尋日出席一個青少年活動後，再被問到教學語言檢討嘅事，佢話本港中學未來六年維持現行嘅安排，即「英中上落車」準則不變，佢強調，呢個決定係學校議會、專業意見同埋教師嘅決定，希望各界尊重。佢解釋，家吓嘅微調安排已經喺學校扎根，學校亦需要穩定嘅語言政策配合其他教學科目。雖然佢再三解釋個決定係多方面研究嘅結果，但係就連教協都質疑呢個決定，話局方自欺欺人，罔顧學生學習能力，其他支持母語教學嘅團體肯定更加唔使講啦。
吳得掂話，今次係學生短暫人口下調嘅個別影響，如果有其他分析或意見，應該以數據為基礎，唔可以只講幾句說話，便話咁樣做會影響教學質素。佢呢句話明顯係講畀教協等團體聽喇，挑戰對方隨口批評之前，唔該做多啲研究及掌握數據。
講番轉頭，今次吳得掂企到咁硬，某種程度係同家長大都歡迎呢個決定有關，所以問題嘅癥結係本港家長對英語教學趨之若鶩，如果真係要依家嘅英中落車，可能引發更多批評添。
