英中落車家長愁 教改混亂更添憂
早排網上瘋傳一張港鐵沿線屋苑住戶月入中位數嘅圖表，有補習社乘機用來宣傳暑期班，話小朋友只要報讀，將來可以住得豪啲喎。即係咁，港鐵沿線屋苑同貧富有冇直接關係好難講，但英文中學「上落車」機制就肯定對學生有好大影響嘞。
呢，升中統一派位下星期二放榜，而教育局一○年實施、每六年檢討一次嘅新教學語言政策亦會喺派位後「再微調」。雖然教育局決定維持現有「英中上落車」準則，但係全港大約一百間英文中學仍然有三分之一可能要落車。你知喇，香港社會一向重英輕中，家長爭崩頭都想仔女入讀英文中學，家陣失驚無神轉為中中，就好似原來坐擁無敵海景嘅住宅，忽然畀屏風樓遮擋咁，你話幾無奈吖。
可能知道家長同學生迷惘啩，教育局局長吳克儉尋日大派定心丸，強調即使中學取錄嘅中一新生未符英文成績要求，仍然可以保留現有教學語言，又話個別學校如有需要，可以參與教育局安排嘅教師專業發展及研究項目喎。仲有吖，落車嘅英中亦可以向當局提交補救計劃，包括重點培訓教師，協助學生提升英語水平。
教育局呢個安排，美其名暫保英中，好似照顧家長同學生嘅感受，實際上係掩人耳目，自欺欺人。有家長團體就講得啱嘞，部分落車英中為咗遷就英語能力較弱嘅學生，可能要夾雜中文教學，只會令英中變得名不副實嘅咋。
點解咁多英中要落車？當局係咁解釋嘅，中一適齡學童逐年下跌，由一一年嘅六萬幾人減至下學年估計嘅四萬七千幾人，以致愈來愈多唔達標嘅小六學生可以升讀英中喎。咁就奇嘞，學生少咗，教學資源更加集中，照計學生語文能力應該改善至係，點解情況啱啱相反？好明顯，學生不足只係藉口，教育政策失敗至係真。
唔係亂噏o架，回歸後教育政策朝令夕改，五時花六時變，最初推行母語教學，一刀切劃分英中、中中，被人批評造成標籤效應，惟有引入上落車機制，後來又搞所謂「微調」，包括容許部分中中開英文班，反反覆覆，兜兜轉轉，搞到學生同家長無所適從。加上教師語文水準每況愈下，劣師出低徒咯喎，大批英中要落車，又有乜出奇吖。
所以話，教育官僚好大喜功，添煩添亂，市民真係多得佢哋唔少，叮！
