城中鏡：蔡加讚惡補中國歷史
「玩具大王」蔡志明獨子蔡加讚（Karson）近年喺唔少社團組織好活躍，特別係青年工作，唔知係咪蔡志明鋪排佢涉足政壇？早幾日我哋喺一個活動上見到Karson，梗係捉住佢問個究竟。Karson笑稱，其實好多因素令佢投身社會事務，包括爸爸嘅鼓勵。不過講到佢最關注嘅青年工作，其實係未足一歲嘅女兒畀佢嘅啟發。
蔡加讚受囡囡啟發，所以瞓身做青年工作。
唔想個女讀國際學校
Karson話，做咗父親之後令佢反思好多問題，譬如現時港青對內地因唔了解而疏離，將來佢嘅囡囡會唔會咁樣呢？Karson感觸話，佢都係喺外國讀書返來嘅，對於中國嘅知識好貧乏，依家要靠睇歷史書「補習」，所以佢唔想畀個女讀國際學校，最緊要先讀本地學校學好中文，事關中文係將來全世界最重要嘅語言，然後再視乎囡囡嘅興趣，決定留港讀大學抑或到海外留學。
