城中鏡：威嚴靠撇鬚
單車遊世界近年大行其道，唔少支持者用呢種返璞歸真嘅原始方式去旅行，亦有人藉此身體力行籌款。懲教署成立嘅懲教社教育基金，呢幾日就舉辦青海單車行，全程約三百五十公里，佢哋希望籌到五十萬港元，用以推動青海省教育發展。
邱子昭自言留鬍鬚為工作帶來好處。
黎棟國（中）同兩名單車團代表互相交流同合照。
鍾意游完水先返工
早前，基金舉辦咗個啟動禮，懲教署署長邱子昭當然出席，仲邀請埋保安局局長黎棟國做主禮嘉賓添。邱子昭話，佢對踩單車唔算好熱衷，但就鼓勵啲同事鍛煉身體，並透過慈善活動自助兼助人。
邱子昭話，佢鍾意嘅運動係游水，每日要游半個鐘水先精神奕奕返工，呢個游早水嘅習慣佢已經維持咗好多年。咁佢最拿手乜嘢式呢？佢話自由式、蛙式同背泳樣樣游齊，希望藉此鍛煉身體唔同肌肉。作為紀律部隊高層，邱子昭嘅一撇鬚好注目，原來，呢撇鬚背後有段古，話說佢二十歲就加入懲教署，年紀輕輕望落去好嫩口，亦無乜威嚴，為咗令自己望起嚟成熟啲，佢決定留兩撇鬍鬚，後來發現留鬚對工作都有幫助，一舉多得。
主禮嘉賓黎棟國就謙稱，自己踩單車唔算專業，但一定識踩。
