政壇：搞搞政：建制派調兵遣將 范國威腹背受敵

有地區消息透露，本來建制派協調由工聯會高永聯硬撼范國威，但近半個月起，就改由經民聯年輕律師申偉基接手，聽講佢仲會以獨立人士參選，以理性對撼激進嘅范國威，呢次范國威攬唔攬得實張櫈，真係好難講嘞。

調走申偉基

新同盟一○年成立，一一年區議會選舉首次喺西貢、沙田及大埔派出十人參選，八人當選，成功率好高，今年聽講會派更多人出選，建制派梗係要狙擊，避免坐大。

據講申偉基本來打算喺沙田火炭選區出選，硬撼現任公民力量嘅龐愛蘭，同場仲有盛傳會出選立法會新界東補選嘅公民黨楊岳橋。之不過，據知操盤人亦認為，兩個建制派咁樣打法，隨時會益咗泛民，於是決定將申偉基調走。

Gary位處嘅西貢運亨選區，本來建制派協調由高永聯出選，但操盤人考量過勝算後，就決定轉人，而申偉基唔用經民聯排頭，就惹來唔少揣測。

有人話經民聯早前喺政改方案投票「甩轆」，擔心變成負資產；更有指經民聯之前唔支持申打番建制派，申就憤而退黨。我哋問過申偉基，佢就無厘頭叫我哋睇佢社交網站專頁，又話有嘢做緊，「遲啲講」，避答轉區、除黨名以至退黨之說。