政壇：縮沙唔玩辭職公投 何俊仁攞嚟衰

其實之前AV仁一直以「等政改否決」為理由拖延決定係咪辭職，去到六月中政改方案被否決之後，又話要同黨內外再開會商討，一直議而不決，分明係想縮沙唔玩。佢尋日解釋係因為社會氣氛冷淡，覺得無足夠嘅支持同信心進行公投，加上年底會有區議會選舉、明年又有立法會選舉同新界東補選，覺得用精力應付選舉會比較實際。除咗新界東補選外，幾場選舉都一早定晒，AV仁擺明就係輸打贏要，搵藉口縮沙。

AV仁承認支持度同估算有落差，但就話唔係因為白鴿黨一味拖而搞唔成囉。不過，一直主張要搞辭職變相公投嘅社民連議員梁國雄（長毛）尋日暗批AV仁無心做。其實，AV仁之前開記者會就係威係勢，依家縮沙唔玩，今次嘅故事教訓大家，做咩之前要三思而後行，唔係好似AV仁咁，真係攞嚟衰啦！