政壇：林健鋒玩扑錘一樣甩轆
建制派喺早前政改方案表決期間爆出離場「甩轆」慘劇，其中經民聯立法會議員林健鋒（Jeffrey）成為眾矢之的。尋日，佢出席一個活動，點知玩遊戲再甩轆。
林健鋒玩「打大鐵錘」遊戲都甩轆。
Jeffrey尋日以盛事基金評審委員會主席身份擔任香港龍舟嘉年華主禮嘉賓，按指示玩「打大鐵錘」遊戲時，佢又再次甩轆，呢個遊戲係以錘打目標，Jeffrey事前都兩次度位，希望確保打中目標，到佢舉錘時，現場靜晒，點知落錘一刻，個儀錶只係飆到最低嗰格嘅「1948」，即係話，Jeffrey距離目標有距離囉，現場隨即一陣喝倒采聲。
Jeffrey即刻向大家解釋自己「玩乜」，佢話自己係專登打中最低「1948」嗰格，係代表「1949」中共建國年份喎！「等埋發叔」已經兜得肉酸過人，依家又嚟一劑，Jeffrey真係要練吓執生技能。
