政壇：梁卓偉唔玩跳級制
文憑試放榜將至，大學搶收尖子可以去到幾盡？中文大學醫學院早前宣布推出尖子可以直升二年級的「跳級制」吸納「尖中尖」，隨即惹來香港大學醫學院院長梁卓偉（Gabriel）嘅回擊，聲言教育唔可以走捷徑。私底下，佢仲回覆咗個電郵畀一私人朋友，強調醫科係「人命攸關」，唔可以亂跳級，同時又引用古詩「本是同根生，相煎何太急」，叫中大醫學院搞清楚競爭對手。佢地學院又去信畀政府、醫委會、教資會等。
（設計圖片及對白）
Gabriel尋日同傳媒茶敍，一坐低又再被問到會否跟隨中大醫學院玩跳級制，佢即刻強調，學生讀港大定中大，真係個人選擇，從來都唔想特登搶學生、爭學生，學生適合讀邊個課程先最重要。不過，佢坦言，任何跳級安排對學生來講都會好吸引，只係必須釐清咁樣跳法啱唔啱規矩囉！佢堅持暫不打算實施呢種安排：「正如我之前講，人命攸關嘅醫科，真係要諗真先！」
稱同陳家亮好friend
被問到佢同中大醫學院院長陳家亮friend唔friend時，佢就高八度話：「咩呀！梗係friend啦！早排先同我selfie（自拍）張相。」有圖就有真相，可惜佢話張相唔喺手機內喎。為咗說服大家兩間醫學院「真係」冇不和，佢仲讀出自己之前寫嘅電郵，內容係兩間醫學院真正嘅競爭對手係外國、內地嘅醫學院，而唔係中大同港大自己人鬥自己人，大家應該一齊令香港醫學教育進步。封信到底寫畀邊個呢？Gabriel仲話要保持秘密喎！
轉過頭Gabriel又話港大去年有八成學生都符合中大跳級要求，若果要推行跳級都唔知可以點做。而且港大醫科六年課程科科都唔係「閒科」，好難讀少啲：「我唔係開補習社，如果要配合市場而跳級，我做唔到。」佢話學院已去信醫委會、教育局及教資會查詢。
