工務小組急就章 皆因平時一味拖
學生平時唔讀書，考試先至臨急抱佛腳，成績肯定唔慌好得去邊。同樣道理，立法會議員平時不務正業，拉布流會當食生菜，最後一次會議先至急就章通過大量議程，議政有冇質素，唔使問都知喇。
係咁嘅，立法會工務小組委員會尋日舉行本年度最後一次會議，結果一口氣通過十一項議程。咪以為政客轉死性，突然咁有工作效率，其實係拖無可拖咋。呢，其中七項議程最後十五分鐘極速通過，政客為咗趕收工，求求其其，敷衍了事，講得好聽叫有效率，其實根本係不負責任。
係人都知，工務小組由反對派把持，佢哋冇嘢叻，最叻就係玩嘢，一日到黑大搞不合作運動，唔係拉布就係流會，再唔係就中止待續，導致議案堆積如山。就以尋日通過嘅議程嚟講，全部同地區民生設施有關，同政治風馬牛不相及，例如提升元朗污水處理廠為元朗淨水設施、社區重點項目計劃等等，咁都要拖到最後一刻先至表決，議員連提問嘅時間都冇，有冇再離譜啲吖？咁仲唔係敷衍了事？
最荒謬嘅係，反對派仲沾沾自喜，聲稱喺佢哋控制下，工務小組成功迫使政府將未成熟嘅項目撤回或中止待續，達到監察行政機關嘅效果喎。呢啲咪叫顛倒是非囉，如果唔係反對派平時阻頭阻勢，唯恐天下不亂，議會又點會空轉，施政又點會癱瘓，香港又點會停滯不前喎。淨係高鐵工程咋，最新超支金額逾二百億元，仲要延至二○一八年第三季至有望通車，港府及港鐵固然有責任，反對派當初百般阻撓，一樣難辭其咎嘅咋。
冇計嘞，近年香港好似食錯藥咁，社會高度政治化，日日家嘈屋閉，令人不勝其煩。家陣政改話就話被否決，港府亦講明集中精力改善經濟民生，連京官都自動收聲唔再評論政改，不過咪以為咁就可以耳根清淨，正所謂樹欲靜而風不止，反對派未達到政治目的，又點會咁輕易收手吖。嗱，當局為咗利民措施可以順利過關，不惜將創科局嘅撥款申請押後，財委會審議呢啲民生議程時，反對派會唔會繼續玩嘢，到時咪知囉。
都係古人講得啱，慶父不死，魯難未已。反對派一日唔放棄不合作運動，香港都唔使旨意有運行。回歸十八年，亂足十八年，今日係七月一日，政治爭拗再起，唔通又係另一場亂局嘅開始？叮！
