城中鏡：發叔夠精靈
劉皇發自五月底忽然宣布放棄連任新界鄉議局主席，加上日前表決政改方案又發生「等埋發叔」甩轆鬧劇，之後發叔一直深居簡出，連立法會會議都統統缺席。久未露面嘅發叔尋日終於現身鄉議局「七一」酒會，雖然佢全程右手撐住拐杖出入，但頭腦仲好精靈，對於一切不利嘅傳聞不作回應；我哋仲聽聞佢點都唔會提早將立法會議席交棒添！
劉皇發（中）全程右手撐住拐杖出入，但頭腦仲好精靈。
劉業強（左）捉住上水鄉委會主席侯志強傾偈，但冇回應接發叔嘅立法會議席傳聞。
龔仁心樂得清閒，得閒同太太行吓山過日辰。
有報道話發叔一直部署連任鄉議局主席，只係被西環同鄉議局副主席張學明聯手逼宮而被迫無奈放棄，亦有指佢會提早將立法會議席交棒大仔、現任鄉議局主席劉業強。發叔聞言只係話「乜嘢都見唔到」，又話「唔講住，等身體好番先」，「順住健康發展」喎。
事實上，聽聞劉業強接任鄉議局主席嘅時間太短，十月先正式舉行就職典禮，發叔無意急於任內交棒畀劉業強接任立法會議員，點都做埋明年任期完結，等明年底選舉先再執位。至於會唔會有人想同劉業強爭位坐，有鄉紳笑言想搶，但就話都要搶到至得。
龔仁心無官司一身輕
至於劉業強，可能新上任冇耐，除咗擔大旗致辭外，似乎未係好習慣面對鎂光燈，被連番追問下都只係帶我哋「遊花園」，喺酒會行來行去避開追訪。
喺酒會上仲見到華懋慈善基金主席龔仁心，佢笑言經歷八年官司纏身嘅日子，加上退休冇再行醫，依家樂得清閒，得閒同太太行吓山，幫手管理慈善基金過日辰。
