政壇：搞搞政：公文袋 白鴿黨 民望大插水

香港研究協會喺上月二十四至二十八日，訪問咗一千零八十四位市民，邀請佢哋就立法會內十五個政團評分，以一分代表非常不支持，五分代表非常支持。結果顯示，堅決否決政改嘅泛民主派跌幅較大，特別係擁有六席嘅公文袋，下跌咗零點一六分至二點三三分，排喺第九位，係十五個政團中跌幅最大嘅一個。同樣有六席嘅白鴿黨就跌咗零點一四分至二點二八分，排第十一位，係十五個政團中跌幅最大嘅第二位。

否決政改 不得人心

雖然泛民係否決政改嘅頭號劊子手，但建制派喺表決當日離場甩轆，令方案喺大比數之下被否決，成為歷史印記。建制派將成件事歸咎於要「等埋發叔」、經民聯成員劉皇發，令經民聯亦成為千古罪人。今次嘅民調，經民聯就跌咗零點一二分，得二點一分，排名第十四位，屬尾二位置，係建制派當中跌幅最大嘅政團，亦係十五個政團中跌幅最大嘅第三位。

建仔同新民黨嘅評分就分別下跌咗零點一一分，得分為二點五五同二點四九分，排名第五及第六位。而喺表決時走剩陳婉嫻所屬嘅工聯會，評分就只係跌咗零點一分，評分為二點四分，排名第八。唔知係咪佢嘅一票支持幫工聯會攞番少少分呢？

調查機構話泛民同建制陣營嘅評分皆錄得下跌，相信前者係因否決政改，令港人普選夢落空，而後者係因投票日甩轆，表現令支持政改嘅市民失望。調查機構仲話各主要政團嘅評分都不足三分，反映佢哋嘅表現同市民嘅期望有較大差距。睇嚟不論係泛民定建制，都應好好反思。