政壇：顏寶鈴向被鬧議員道歉
話說建制派立法會議員就政改方案投票當日離場甩轆，搞到方案被泛民主派大比數否決。事後建制派議員以及港區全國人大代表嘅WhatsApp群組對話相繼曝光，其中身兼港區人大代表嘅工業家顏寶鈴就喺人大群組狠批班建制派係「垃圾議員」。不過，顏寶鈴尋日就喺報章撰文，話自己只係一時衝動、語氣過激，已經同班議員道歉。佢仲話日後會謹言慎行，不斷鞭策自己，唔知仲以為佢犯咗咩滔天大罪。
顏寶鈴話日後謹言慎行，不斷鞭策自己。（資料圖片）
反之，應該道歉嘅建制派議員鍾樹根，尋日出席電台節目時就無為甩轆事件道歉，反而繼續對WhatsApp事件高談闊論，透露有關方面已捉到洩密「內鬼」，所以叫大家唔使再捉「內鬼」喎。樹根話「內鬼」同佢一樣都係口沒遮攔，但現在已變乖。當被節目主持問放料人係咪「獨立人士」同「着短褲」時，樹根就話「你都講到好明喎！」佢仲話洩密事件對區議會選舉好大影響，仲要去唔同地區開「補鑊會」添！
