香港電台尋日舉行一年一度嘅「香港書獎」頒獎禮,選出年度書籍,經過舊年佔領行動,唔少得獎書都同香港本土身份有關。我哋尋日喺頒獎禮上,竟然見到《香港城邦論》作者、同港獨及本土派行得愈來愈近嘅陳雲獲獎,唔通港台鼓勵宣揚港獨?原來港台只係頒獎畀佢有份寫嘅《香港粵語頂硬上》啫!

同港獨及本土派行得愈來愈近嘅陳雲,獲港台頒書獎。

我哋問陳雲點睇本土思潮,佢就話係緣起於「普教中」、雙非兒童等事,令民間受壓,港人覺得生存空間被破壞。講到早前有涉嫌本地激進派製造爆炸品,佢就唔回應係咪認識嗰啲被告,叫我哋問番警方喎。咁佢身為嶺南大學教授,有冇受大學壓力呢?陳雲好玄咁話:「香港九七後冇咗大學」,唔知各位點理解佢嘅說話呢?

講番其他書,佔領行動期間唔少人喺佔區手執由中大政政系助理教授周保松寫嘅《政治的道德:從自由主義的觀點看》,佢尋日就多謝同場恩師、教育學院亞洲及政策研究學系講座教授呂大樂,點知出版社編輯原來係周保松學生,變成「三代同堂」。

第一手消息請下載on.cc東網iPhone/iPad/Android/Windows Phone Apps