政壇：泛民唔敢拉布阻民生
立法會工務小組委員會喺暑假休會前最後一次開會，唔知係咪因為區議會選舉臨近，之前拉布嘅泛民都收晒章，急急腳通過多項議程，因為喺呢個會過唔到嘅議程，就趕唔切暑假之前交到財務委員會，民生無小事，可能因為唔想選舉票債票償，拉布都跪低晒，睇怕最開心嗰個可能係民政事務局局長曾德成。
一開波第一項議程，係審議多區十個社區重點項目計劃，用咗最耐時間，一共兩個幾鐘頭，不過涉及咁多個計劃，要啲時間傾都在所難免，亦未有議員要求點人數，或者故意不斷發言拖延時間，委員會主席「袋巾傑」梁家傑提出，將爭議比較大嘅計劃分開表決，最後都順利通過咗該項議程嘅所有社區重點項目計劃。嘩！社區重點工程喺各個區議會拗咗好耐，交咗上立法會又遇到拉布，拖咗咁耐終於通過，德成局長掩住口笑啦！
袋巾傑官員齊玩急口令
之後三項議程都用咗唔使一個鐘時間就已經傾完，明明加時半個鐘嘅會，眼見已經得番大約十五分鐘，議員同官員都開始慌，官員臨尾有幾項直情完全唔講簡介，議員都有幾項唔敢問問題，極速表決七項議程，最短時間嗰項只係用咗一分鐘多啲就通過咗。期間，「袋巾傑」同政府官員都好似玩急口令咁，教育局副局長楊潤雄急到喺梁家傑未介紹完，就搶閘講嘢。
「袋巾傑」喺會上多次提出，如果委員想提意見，可以在財委會審議之前以書面提出，以便審議更多議程。不過到最後都仲有六項議程過唔到，包括活化虎豹別墅同必列啫士街街市、另外六個社區重點項目計劃、港珠澳大橋香港口岸嘅填海及口岸設施，其實市民一樣可以要泛民票債票償。
