貪曾禍港埋炸彈 點止高鐵咁簡單

唔係講笑，港鐵即將向港府遞交高鐵最終超支報告，傳聞超支額增至三百億元，令總造價飆升至九百五十億元，係咪最終成本，條數到底由邊個找，仲係未知之數。其實，高鐵之所以搞到今時今日唔湯唔水，咪就係前特首曾蔭權爵士嘅「好帶挈」囉。

點解咁講？嗱，繼運房局局長張炳良暗批將高鐵項目交畀港鐵管理係「所託非人」後，立法會交通事務委員會主席田北辰進一步爆料，指港鐵當年評估有關工程費用約八百億元，預計二○一七年先至可以通車，點知貪曾好大喜功，係都要還價六百五十億元及二○一五年通車，大石壓死蟹咁款，港鐵無奈答應，咁就埋下今日嘅禍根嘞。

具體嚟講，目前高鐵工程面對三大未解決問題：即係「一地兩檢」未解決；港鐵與政府如何承擔超支金額未解決；同埋承建商如何按原有設計興建西九龍總站嘅天幕未解決。最令人擔心嘅係，萬一港府及港鐵為超支問題對簿公堂，明年初高鐵項目再無新注資，承建商可能因為無法負擔薪酬開支而遣散員工，工程隨時「半爛尾」，淪為政治炸彈。就算最終傾掂數，工程可以恢復，超支同延誤問題咪又係進一步加劇，橫又死，掂又死，港鐵都唔知點收科，你話貪曾係咪罪大惡極吖？

話時話，貪曾禍港罄竹難書，又點止高鐵工程一單吖，房屋問題、中港矛盾、廉潔蒙污……冇一瓣唔係大問題，冇一瓣唔係貪曾搞出嚟嘅爛攤子。冇冤枉，如果唔係貪曾拓土建屋放軟手腳，又點會搞到咁多無殼蝸牛望樓興嘆喎；如果唔係貪曾視雙非童為人口生力軍，對內地孕婦來者不拒，又點會搞到中港矛盾愈演愈烈喎；如果唔係貪曾掛住同富豪勾勾搭搭，帶衰個頭，又點會搞到「一朝三貪」，廉潔排名拾級而下喎。

古人就講得啱嘞，慶父不死，魯難未已。香港想要重回正軌，貪曾呢個罪魁禍首必須落鑊。當局聲稱，貪曾案三個月內會有最終定案，講係咁講喇，港府呢鋪肯唔肯揸正嚟做，不妨拭目以待，叮！