城中鏡：王庭聰爺孫檔 Sing援貧農
雖然近日股市急跌，加上零售業吹淡風，無損商界為慈善團體籌款嘅熱情。幫助內地貧困農戶自力更生嘅國際小母牛香港分會於日前舉行慈善晚宴，多位名人同高官展歌喉籌款。小母牛副主席葉澍堃一曲值萬金，聲沙沙落力獻唱，話咁易進帳四十萬元。小母牛籌委會副主席王庭聰都唔執輸，抱埋可愛孫女，兩爺孫唱閩南語名曲《愛拚才會贏》，數十萬元善款滾滾來。
王庭聰抱埋孫女獻唱，心情好靚。
杜振源（中）搞籌款，好友葉澍堃（右）同佳能高層鄧慶治鼎力支持。
杜振源太太曹麗明（左）同細女杜泳璇（右）到場支持善舉。
杜振源碌盡人情卡
唱得興起，王庭聰加碼，拍心口預告將細女王麗盈年底結婚嘅一百萬元禮金捐予小母牛。咦？仲未擺酒就知道有一百萬禮金收？佢笑言就算收唔到咁多，佢都會包底照捐喎。
股市近排急跌，唔少人荷包縮水，未知有否影響籌款？籌委會主席Simon杜振源就話市道暢旺也好，淡靜都好，要揼人心口籌款，從來唔易，一切要靠平日累積人際網絡，人家先會畀面你。睇嚟Simon做小母牛籌委會主席多年，真係多得佢不停碌人情卡，先有源源不絕嘅善款喇！而當晚就合共籌得七百萬元。
講起做生意，最近韓國新沙士疫情令到好多商家頭痛。做文具生意嘅Simon都關注疫情嘅最新發展，佢坦言韓國買家靜晒，查詢報價嘅電郵減少兩、三成，惟有靜待疫情減退。
