政壇：搞搞政：偷渡來港讀書陳新滋企硬

陳新滋話細個因為文化大革命而冇書讀，連向朋友買嘅書睇完，都要即刻「焚書」，為咗讀書仲游水偷渡嚟香港，真係得來不易。可能佢捱過辛苦，所以好堅持自己原則。佢畀自己做校長嘅表現打六十分，講到兩年前嘅李惠利地皮爭議，佢承認自己唔夠「牙力」，未能成功爭取起中醫院，係任內一大遺憾。但佢仍然企硬，堅持塊地唔適合起豪宅，校方有責任提出反對，唔能夠為咗同政府保持和諧就投降。

斥學生撐傘 轟本土無賴

佢講到明唔會刻意奉承政府，亦唔會太遷就學生。好似上年畢業禮，佢拒絕向撐黃傘學生頒發畢業證書，作風夠晒強硬。佢話畢業禮係莊嚴場合，學生應有所節制，作為校長不能妥協。講講吓，佢又提到早前舉行新校長諮詢會時，浸大學生會衝擊校董會休息室事件，佢希望學生表達意見時，亦應遵守校規。

至於愈嚟愈激進嘅本土文化興起，佢批評部分反水客示威者嘅行為似無賴，文明社會唔應該有排外心態，而港獨亦不可行。總之無論講起乜嘢具爭議性嘅話題，佢都係挺直腰骨，拒不妥協。相比接任校長嘅錢大康喺學生衝擊新校長諮詢會後，應承加開諮詢會嘅做法，陳新滋確係夠薑。唔知陳新滋臨別都企得咁硬，係咪暗示被視為開明派、傾向同情學生嘅錢大康，唔好太縱容學生呢？

陳新滋獲浸大頒授為榮休校長，聽日起生效。退休後，佢聲稱會專注研究，唔會擔任政府公職。