政壇：基金輸畀對手 格羅斯唔忿氣
畀人飛，耿耿於懷係人之常情。堂堂債券大王亦唔例外。舊年格羅斯成七十歲先畀自己一手創立嘅太平洋投資管理（Pimco）逼走。佢去咗駿利雖則都成九個月，但仲好唔忿氣，日日準時三點同Pimco較量吓基金表現。不過愈比，格羅斯應該愈瞓唔着，事關佢依家管嗰隻駿利基金唔止輸畀Pimco，仲輸埋畀其他78%嘅基金，由佢接手到今個月初，無賺不特止，仲要倒蝕0.8%。
格羅斯依家管理嗰隻基金無賺不特止，仲要倒蝕。（資料圖片）
諗住隻駿利基金喺格羅斯手上會變成Pimco第二，準備入定貨先？Sorry，格羅斯講到明唔止無諗過要打造「Pimco第二」，仲質疑無人做得到。理由係？佢話自己後生時勁到無人有，專做啲人哋唔做，或者做唔到嘅嘢，冇乜嘢啫，只係連續三個月日日喺賭場玩21點玩足16個鐘，同埋六日內跑六場馬拉松咁啦，就係要咁盡，先搞到間Pimco出嚟。
不過，格羅斯都知「剎那光輝唔代表永恒」，仲話自己同NBA名將高比拜仁一樣英雄遲暮。聽聞，有傳高比仔出年就退休，咁債王又打算幾時退下火線？知還知，唔等於接受。
