政壇：李小加教人入市亂晒龍
港交所行政總裁李小加上星期六（即是大前日）喺上海話，星期一（即是尋日）喺A股市場「學習日」，仲教路散戶上晝開市，可小注入市試水，下晝有賺就大市好牛，若蝕就當交學費咁話。話口未完，勢估唔到尋日A股暴跌到不能形容，直頭係喪跌。昨日嘅小加即刻打倒大前日嘅小加，話身為市場營運者如港交所，係唔應該預計市場表現。好明顯，尋日呢Day「學習日」，小加總裁都學到嘢。
李小加話港交所係唔應該預計市場表現嘅。
小加尋日又呼籲大家「既來之，則安之」，仲話尋日係「冷靜日」，叫入咗市嘅唔好心急，慢慢享受自己嘅投資收益，未入市嘅就要審慎。佢仲話長期嚟講，A股可為股民帶來財富咁話。嗱嗱嗱，話口未完，又嚟估市？冷靜啲、冷靜啲。
李：證監是「大老闆」
唔講市，講第二樣，講吓證監會睇嚟唔多撐同股不同權上市制。一講到呢樣，小加就話港交所上市委員會同證監係「一對英雄好漢，個個敢作敢當」。
不過，原來英雄好漢都有分大細。事關小加話港交所上市委員會喺呢個議題上搞咗成兩年，係有立場，不過只係「二老闆」，證監先係「大老闆」。小加仲講到明「大老闆說話了，二老闆要跟着大老闆的說話，我們打工仔只是跟着老闆們說話，既然老闆已經定了，老闆已經有了框架，我們就按着這樣做」。
至於監管當局最後批唔批，小加話家陣已經到咗「明知山有虎，偏向虎山行」地步。咁即係點？隻老虎係講緊邊個呢可？
