我哋喺前年報道過，上水鄉事委員會主席侯志強半夜徒手捉蛇，仲攞嚟煲湯進補，霸氣十足。原來佢唔止識捉蛇，打野豬都好叻。侯志強話北區山多，有好多野豬，佢得閒都鍾意打吓野豬，必殺技係由豬前腿直插心臟，咁野豬就必死無疑。捉咗蛇都要食落肚，打咗野豬更加要食咗佢，侯志強盛讚野豬肉比街市豬香，又少啲肥膏咁話。

侯志強唔止識捉蛇，打野豬都好叻。（資料圖片）

最近新界東立法會議席補選備受政黨關注，唔少人都虎視眈眈，外傳侯志強可能代表鄉議局參選，不過自由黨亦有意派另一人出戰。身兼富貴黨黨員嘅侯志強咪左右為難？佢話仲未同黨傾過呢件事，今次如果出選，都係代表鄉議局，所以最後會由鄉議局決定係咪參選喎！

講到佢身為北區區議員嘅工作，佢竟然話其中一項主要工作係請街坊食飯，仲自爆每星期都會請五十個街坊去酒樓或茶餐廳食飯，每位成本三十蚊，有時仲請晒成家人食，志在幫吓啲家庭喎！

第一手消息請下載on.cc東網iPhone/iPad/Android/Windows Phone Apps