政壇：高永文斷民陣米路

食衞局轄下嘅食物環境衞生署早前話，有「其他政府部門」認為，銅鑼灣怡和街對出行人路係遊行路線較為狹窄嘅路段，如果擺設臨時街站，會對遊行人士及其他道路使用者造成「嚴重阻礙」，所以唔批臨時小販牌照。雖然食環署冇講到明，但大家都估到呢個部門係講緊警方。

或向擺街站本土派追數

民陣尋日就帶同舊年七一遊行同樣地點嘅相片，到政府總部遞交上訴書。民陣召集人陳倩瑩話，以往多年，佢哋都喺同一地點擺街站，亦冇造成阻塞，舊年只係因為太多遊行人士、太少遊行路線而搞到塞車。佢認為今次係警方借食環署作政治打壓。

據知其他團體都有唔同街站不獲批牌照，不過白鴿黨、公文袋、大愛同盟同民主動力決定協調去其他位置擺，唔會挑戰政府。但社民連就唔理禁令，擺明「公民抗命」咁話。警方尋日重申，由於有九個街站阻礙遊行，所以建議佢哋喺其他地方擺街站，其中四個已經重新入表改地點。

另外，以往喺民陣遊行途中擺設街站嘅團體，如果有籌款嘅話都會按不明文規定，將籌款總數一成上繳民陣，當係幫補遊行開支。但近年有本土派「又食又拎」，籌款之餘又唔上繳民陣。民陣就話如果呢啲本土派再擺街站籌款，或者會考慮追番條數喎。