港鐵一日三故障 只識加價不改進

尋日朝早七點幾，東鐵線九龍塘同大圍站之間發生訊號故障，列車服務延長十五分鐘；到咗中午，機場快綫有列車故障，行車時間延誤之餘，市區預辦登機服務亦一度暫停；下午兩點左右，又輪到東涌線訊號故障，列車再度延誤。唔通真係衰開有條路，一不離二，二不離三？

講真，港鐵事故頻頻，三日唔埋兩日跪低，市民早就不勝其煩，怨聲載道。好似今次東鐵線咁，又係揀正朝早繁忙時間至出事，簡直靠害。正如有乘客話齋，港鐵服務質素不斷插水，但講到加價就鬼咁積極，年年賺大錢年年加價，點都講唔通囉。

唔提加價猶自可，一提把幾火。港鐵上個禮拜至加價，部分路線加幅更超過一成，飛擒大咬，點知加價第一日就接連發生兩宗故障，都唔知係攞景定贈興。港鐵事故不絕，直頭好似傳染病咁，到底問題出喺邊？有立法會議員就講得啱嘞，無論係系統超出負荷抑或訊號系統老化，港鐵都有必要向公眾交代清楚。

話時話，港鐵豬籠入水，淨係舊年就賺超過一百五十億元，咁都可以年年加價，全世界都搵唔到第二間。港鐵票價話就話可加可減，其實根本係有加無減，市民肉隨砧板上，認真無奈。當然喇，為咗掩人耳目，港鐵年年都推出回程折扣、假期半價等所謂嘅優惠，可惜限制多多，好睇唔好食，擺明敷衍市民。

好多人諗極都唔明，港鐵雖然係上市公司，但始終係公共交通機構，況且港府係最大股東添，點可以唯利是圖，完全唔顧社會責任o架。

講開又講，港鐵管理混亂，問題多多，點止事故頻頻咁簡單吖。好似高鐵工程咁吖，不斷延誤，不斷超支，已經淪為財政黑洞，最新估計造價可能逼近一千億元大關，超支達三百億元，呢條數最終咪又係由納稅人埋單。

點講都好喇，港鐵振振有詞跟足機制加價，市民無可奈何，只能焗住接受。之不過咁，發財需要立品，加價需要改善服務，否則，一流收費，九流水準，搞到事故多過食飯，跪低多過正常，咁又點可以令人信服呢？叮！